पडघा, ता. २ (बातमीदार) : पडघा वनपरिक्षेत्र कार्यालयाच्या वतीने हनुमान जयंती विविध आध्यात्मिक कार्यक्रमांनी उत्साहात साजरी करण्यात आली. वनपरिक्षेत्र कार्यालयाच्या आवारातील हनुमान मंदिरात हा सोहळा मोठ्या भक्तिभावाने पार पडला.
कार्यक्रमाचे आयोजन वनपरिक्षेत्र अधिकारी रमेश रसाळ यांच्या मार्गदर्शनाखाली करण्यात आले. या वेळी अभिषेक, महाआरती, सत्यनारायण पूजा; तसेच महाप्रसादाचा लाभ देण्यात आला. धार्मिक वातावरणात पार पडलेल्या या कार्यक्रमाला वनकर्मचारी आणि स्थानिक नागरिकांनी उपस्थिती लावली. या वेळी जय हनुमान प्रासादिक नवतरुण संगीत भजन मंडळाचे भजनसम्राट भगवान बुवा भोईर यांनी सादर केलेल्या सुश्राव्य भजनांनी उपस्थितांची मने जिंकली. त्यांच्या भजनामुळे कार्यक्रमाला अधिकच रंगत आली. कार्यक्रमादरम्यान वन विभागाचे अधिकारी, कर्मचारी, पोलिस अधिकारी; तसेच त्यांच्या कुटुंबीयांसह परिसरातील नागरिक मोठ्या संख्येने उपस्थित होते.