धारावीत ‘जोतिबाच्या नावानं चांगभलं’
पालखी सोहळ्यात भाविकांची गर्दी
धारावी, ता. २ (बातमीदार) : महाराष्ट्राचे कुलदैवत जोतिबा यांच्या यात्रेनिमित्त धारावीत ‘जोतिबाच्या नावानं चांगभलं’ असा जयघोष करत गुलाल व खोबऱ्याची उधळण करण्यात आली. धारावी क्रॉस रोड, शिवनारायण बावडी येथील ऐतिहासिक मंदिर परिसरात गुरुवारी मोठ्या उत्साहात हा सोहळा पार पडला.
मंदिरात पहाटे काकड आरती, दुग्धाभिषेक, होमहवन आणि इतर पूजाविधी करण्यात आले. हिंदभूमी क्रीडा मंडळ आणि शिंदे परिवारातर्फे या उत्सवाचे दरवर्षी आयोजन केले जाते. कोल्हापूर, सांगली, सातारा तसेच कर्नाटकातील मूळ गावे असलेले अनेक भाविक मुंबईत वास्तव्यास असल्याने ते येथे मोठ्या संख्येने दर्शनासाठी येतात.
धारावी, पनवेल, कल्याण, वसई-विरार तसेच लालबाग आणि भायखळा परिसरातूनही भाविकांनी मोठी गर्दी केली होती. यात्रेचे प्रमुख आकर्षण असलेली ‘सासनकाठी’ मोठ्या जल्लोषात मिरवण्यात आली. ही काठी मंदिरातून निघून धारावी मुख्य रस्ता, कोळीवाडा, मुकुंद नगर, काळा किल्ला मार्गे फिरून संत रोहिदास मार्ग आणि संत कक्कया मार्गावरून पुन्हा शिवराज उद्यान मार्गे मंदिरात परत आणण्यात आली. ढोल-ताशांच्या गजरात आणि भक्तीमय वातावरणात संपूर्ण परिसर दुमदुमून गेला.