मुरबाड तालुक्यात वाऱ्यासह मुसळधार

मुरबाड (बातमीदार) : माळशेज घाटाच्या पायथ्याशी असलेल्या न्याहाडी आणि टोकावडे परिसरात गुरुवारी (ता. २) सायंकाळी जोरदार वाऱ्यासह मुसळधार पावसाने हजेरी लावली. या अवकाळी पावसामुळे उकाड्याने हैराण झालेले नागरिक सुखावले असले तरी शेतकरी आणि वीटभट्टी व्यावसायिकांचे मोठे नुकसान झाले आहे. गुरुवारी सायंकाळी अचानक आलेल्या पावसामुळे ग्रामीण भागात एकच तारांबळ उडाली. या पावसात शेतकऱ्यांनी आपल्या गुरांसाठी साठवून ठेवलेली वैरण भिजल्याने चारा खराब होण्याची भीती निर्माण झाली आहे. तसेच, वीटभट्ट्यांवरील कच्च्या विटांचे मोठ्या प्रमाणावर नुकसान झाले असून व्यावसायिकांना आर्थिक फटका बसला आहे. तालुक्यातील वैशाखरे आणि धसई परिसरातही जोरदार वाऱ्याने धुमाकूळ घातला. या भागात पावसाच्या तुरळक सरी कोसळल्याची माहिती ठाणे जिल्हा परिषदेचे माजी सदस्य सुभाष आप्पा घरत यांनी दिली.