तारापूर परिसरात डासांचा प्रादुर्भाव
एमआयडीसीतील नाल्यांमध्ये रसायनांचा विसर्ग
बोईसर, ता.३ (वार्ताहर): तारापूर औद्योगिक क्षेत्रातील नाल्यांमधून उघडपणे वाहणाऱ्या रासायनांमुळे परिसरात डासांचे प्रमाण झपाट्याने वाढले आहे. त्यामुळे एकीकडे दुर्गंधीयुक्त पाण्यामुळे पर्यावरणाचा समतोल बिघडत असून दुसरीकडे नागरिकांच्या आरोग्याचा प्रश्नही गंभीर झाला आहे.
काही उद्योग नियम धाब्यावर बसवून कोणतीही प्रक्रियेविना सांडपाणी थेट नाल्यात सोडत आहेत. प्रदूषण नियंत्रण मंडळाच्या कारवाया केवळ कागदावर सुरू असून नोटीसा बजावण्याचे सोपास्कार केले जात आहेत. पर्यावरण तज्ज्ञांच्या इशाऱ्यानुसार, दीर्घकाळ अशाच प्रकारे प्रदूषण सुरू राहिल्यास शेती, पिण्याचे पाणी आणि स्थानिक जैवविविधतेवर अपरिवर्तनीय परिणाम होण्याची शक्यता आहे. त्यामुळे नाल्यांतून वाहणारे रासायनिक पाणी थेट जमिनीत मुरत असल्याने भूजल दूषित होण्याचा धोका वाढला आहे. अनेक ठिकाणी पाण्याचा रंग बदललेला दिसत असून असह्य दुर्गंधीमुळे नागरिकांना नाक दाबून चालावे लागत आहे.