१० वर्षांचा डम्पिंगचा डोंगर हटणार
उल्हासनगरच्या महापौरांचा दौरा; कचरा हटवण्याचे आदेश
उल्हासनगर, ता. ३ (वार्ताहर) : शहरातील नागरिकांच्या आरोग्यासाठी घातक ठरत असलेला डम्पिंग ग्राउंडचा प्रश्न अखेर मार्गी लागण्याची चिन्हे दिसत आहेत. महापौर अश्विनी निकम यांनी स्वतः डम्पिंग ग्राउंडला भेट देऊन परिस्थितीचा आढावा घेतला. वारंवार लागणारी आग आणि त्यातून निघणाऱ्या विषारी धुरामुळे त्रस्त झालेल्या नागरिकांना दिलासा देताना, येत्या मे महिन्यापर्यंत हे डम्पिंग ग्राउंड हटवण्याचे ठोस आश्वासन महापौरांनी दिले आहे.

उल्हासनगर कॅम्प क्रमांक ५ येथील अवैध डम्पिंग ग्राउंडचा प्रश्न गेल्या १० वर्षांपासून प्रलंबित आहे. या डम्पिंगमुळे परिसरात दुर्गंधी आणि वारंवार लागणाऱ्या आगीच्या घटना घडतात. यामुळे संपूर्ण परिसरात विषारी धूर पसरत असून, नागरिकांना श्वसनाचे विकार, डोळ्यांची जळजळ अशा गंभीर व्याधींचा सामना करावा लागत आहे. या पार्श्वभूमीवर महापौरांनी स्थानिक रहिवाशांच्या व्यथा ऐकून घेतल्या आणि प्रशासनाला हा प्रश्न प्राधान्याने सोडवण्याचे निर्देश दिले.

पाणीटंचाईवरही उपाययोजनांचे निर्देश
महापौरांच्या दौऱ्यादरम्यान स्थानिक महिलांनी डम्पिंगच्या प्रश्नासोबतच भेडसावणाऱ्या तीव्र पाणीटंचाईचा मुद्दाही मांडला. नियमित पाणीपुरवठा होत नसल्याने महिलांनी तीव्र नाराजी व्यक्त केली. यावर महापौरांनी महापालिकेच्या संबंधित अधिकाऱ्यांना तातडीने उपाययोजना करून पाणीपुरवठा सुरळीत करण्याचे आदेश दिले आहेत.

मे महिन्यापर्यंत तोडगा निघणार
अवैध डम्पिंग ग्राउंड पूर्णपणे हटवण्यासाठी महापालिकेने विशेष कृती आराखडा तयार करावा, अशा सूचना महापौरांनी दिल्या आहेत. मे महिन्यापर्यंत हा परिसर कचरामुक्त करण्याचे आश्वासन मिळाल्याने स्थानिकांमध्ये आशेचे वातावरण आहे. आता प्रत्यक्ष अंमलबजावणीकडे संपूर्ण शहराचे लक्ष लागले आहे.