सकाळ वृत्तसेवा
ठाणे, ता. ३ : खैर झाडांची बेकायदा तोड, वाहतूक व साठा प्रकरणात दहशतवादी पथकाने साहिल चिखलेकर (वय ३६) व आकिब साकीब नाचण (वय ३६) या दोघांना अटक केली आहे. ठाणे बेकायदा कृती प्रतिबंधक विशेष तथा मोक्का न्यायालयाने या दोघांना सहा दिवसांची पोलिस कोठडी गुरुवारी सुनावल्याची माहिती सरकारी वकील संजय मोरे यांनी दिली.
८ जुलै २०२४ ते जुलै २०२५ या कालावधीत पडघा (भिवंडी) ते लांजा (रत्नागिरी) दरम्यान आरोपींनी संगनमत करून कोणताही परवाना नसताना खैर झाडांची तोड करून लाकडाचा साठा व वाहतूक केल्याचे उघड झाले. या गुन्ह्यात सुफियान नाचण, इम्तियाज बरमारे व मेहताब शेख यांना अटक झाली होती; मात्र ते सध्या जामिनावर मुक्त आहेत. याच
दरम्यान, साहिल व आकिब या दोघांना २९ मार्चला अटक केली. दोघांना न्यायालयाने २ एप्रिलपर्यंत पोलिस कोठडी सुनावली होती. गुरुवारी त्यांना ठाणे बेकायदा कृती प्रतिबंधक विशेष तथा मोक्का न्यायालयाचे न्यायाधीश विश्वास मोहिते यांच्या न्यायालयात हजर केल्यावर सहा दिवस पोलिस कोठडी सुनावली आहे. दोघांच्या घरांची झडती घेतली असता कोणताही मुद्देमाल आढळला नाही. या प्रकरणाचा तपास ठाणे दहशतवाद विरोधी पथकाचे सहाय्यक पोलिस आयुक्त-३ चे विजय पाटील हे करत आहेत.