मुगाव येथे रंगली ‘डिजिटल शेतीशाळा’
नानाजी देशमुख कृषी संजीवनी प्रकल्प, पाणी फाउंडेशनचा संयुक्त उपक्रम
शहापूर, ता. ३ (वार्ताहर) : राज्य सरकारचे कृषी विभाग, नानाजी देशमुख कृषी संजीवनी प्रकल्प (पोकरा) आणि पाणी फाउंडेशन यांच्या संयुक्त विद्यमाने शहापूर तालुक्यातील मुगाव येथे भव्य ‘डिजिटल शेतीशाळा’ पार पडली. ‘बदलूया रीत शेतीची... वाढवूया रास समृद्धीची’ या अभियानांतर्गत आयोजित या उपक्रमात तालुक्यातील शेकडो शेतकऱ्यांनी आधुनिक आणि समृद्ध शेतीचे धडे गिरवले.

राज्यातील शेतकरी प्रगत शेती व्यवस्थापनाच्या माध्यमातून सक्षम व्हावा, या उद्देशाने या कार्यशाळेचे आयोजन करण्यात आले होते. या वेळी तज्ज्ञांनी डिजिटल माध्यमाद्वारे शेतकऱ्यांना प्रगत शेती तंत्रज्ञान आणि बदलत्या हवामानाचा सामना कसा करावा, याचे सखोल मार्गदर्शन केले. यामध्ये प्रामुख्याने पेरणीपूर्व मशागत, माती व्यवस्थापन, निविष्ठा उत्पादन, एकात्मिक कीड नियंत्रण आणि भातशेतीचे प्रगत तंत्रज्ञान यावर ऑनलाइन माहिती देण्यात आली.

प्रशासकीय मार्गदर्शन
जिल्हा अधीक्षक कृषी अधिकारी रामेश्वर पाचे व तालुका कृषी अधिकारी कुमार जाधव यांच्या मार्गदर्शनाखाली हा उपक्रम राबवण्यात आला. सहाय्यक कृषी अधिकारी माहेश्वरी भोसले यांनी उपस्थित शेतकऱ्यांना ‘डिजिटल शेतीशाळे’चे महत्त्व पटवून दिले. तसेच, आगामी ‘फार्मर कप’ स्पर्धेत मोठ्या संख्येने सहभागी होण्याचे आणि शेतकरी गट स्थापन करण्याचे आवाहन त्यांनी या वेळी केले.

शेतकऱ्यांचा उत्स्फूर्त प्रतिसाद
मुगावचे सरपंच, उपसरपंच, ग्रामपंचायत सदस्य, महिला बचत गटाच्या सदस्या आणि परिसरातील शेकडो शेतकरी उपस्थित होते. कृषी विभागाच्या विविध योजनांची माहिती आणि आधुनिक शेतीचे तंत्र समजल्याने उपस्थित शेतकऱ्यांनी समाधान व्यक्त केले आहे. डिजिटल शेतीशाळेमुळे दुर्गम भागातील शेतकऱ्यांनाही आता प्रगत तंत्रज्ञान घरबसल्या उपलब्ध होत आहे.