नालेसफाईत ‘रोबोट’ची मदत
पावसाळ्यापूर्वी ठाणे पालिका सज्ज; ११.५० कोटींची तरतूद
ठाणे, ता. ३ : पावसाळ्यापूर्वी होणाऱ्या नालेसफाईवरून दरवर्षी टीकेचे धनी होणाऱ्या ठाणे महापालिकेने यंदा वेळेत आणि प्रभावीपणे काम पूर्ण करण्यासाठी कंबर कसली आहे. शहरातील सुमारे ३८५ किलोमीटर लांबीच्या नाल्यांच्या स्वच्छतेसाठी पालिकेने ११.५० कोटी रुपयांचे व्यापक नियोजन केले असून, यंदा प्रथमच आधुनिक ‘रोबोटिक’ यंत्रणेचा वापर करण्यात येणार आहे.

महापालिकेच्या घनकचरा विभागामार्फत नऊ प्रभाग समितीअंतर्गत येणाऱ्या मुख्य नाले आणि उपनाल्यांची सफाई केली जाणार आहे. सध्या निविदा प्रक्रिया सुरू असून, १५ एप्रिलपर्यंत कार्यादेश दिले जातील. त्यानंतर २० एप्रिलपासून प्रत्यक्ष नालेसफाईला सुरुवात होईल, अशी माहिती प्रशासकीय सूत्रांनी दिली. मागील वर्षाच्या तुलनेत यंदा या कामांवरील खर्चात वाढ करण्यात आली आहे.

आधुनिक तंत्रज्ञान
यंदाच्या नालेसफाईचे मुख्य वैशिष्ट्य म्हणजे तंत्रज्ञानाचा वापर. शहरातील वर्दळीच्या आणि कठीण ठिकाणी पहिल्या टप्प्यात १० रोबोटिक यंत्रणा तैनात केल्या जाणार आहेत. यामुळे मनुष्यबळावरील अवलंबित्व कमी होऊन कामात गती येईल. खाडीकिनारी असलेल्या कळवा आणि माजिवडा-मानपाडा भागात यांत्रिक पद्धतीने गाळ काढला जाणार आहे. तसेच, संपूर्ण कामाचे चित्रीकरण (व्हिडिओग्राफी) करून त्यावर अधिकाऱ्यांमार्फत कडक देखरेख ठेवली जाणार आहे.

पाणी साचण्याच्या समस्येवर लक्ष
अनेकदा नालेसफाई होऊनही नाल्यांच्या शेवटच्या टोकावर गाळ साचल्याने पाणी तुंबण्याच्या घटना घडतात. यंदा कल्व्हर्ट्सची सफाई आणि नाल्यांच्या मुखाशी साचलेला गाळ काढण्यावर विशेष भर दिला जाणार आहे. ब्गेल्या काही वर्षांतील अनुभवातून धडा घेत, पावसाळ्यात शहरात पाणी साचू नये आणि अपघात टाळता यावेत, यासाठी यंदा पालिकेसमोर हे काम वेळेत पूर्ण करण्याचे मोठे आव्हान असणार आहे.

प्रभागनिहाय नाल्यांची संख्या :
कळवा : २०१
दिवा : १३१
मुंब्रा : ८० ना
नौपाडा : ४९
माजिवाडा-मानपाडा : ४४
वागळे इस्टेट : ३८
लोकमान्य-सावरकरनगर : ३४
वर्तकनगर : २९
उथळसर : ४