गोळीबार प्रकरणातील दोघांना
तीन दिवसांची पोलिस कोठडी

सकाळ वृत्तसेवा
ठाणे, ता. ३ ः मुंब्रा येथे वादातून झालेल्या गोळीबारात एकाचा मृत्यू झाला. दोघे जखमी झाल्याप्रकरणी गोळीबार करणाऱ्या जयन शिवानंदन नायर (वय ५१) आणि त्याची मानलेली बहीण अन्नू शेख यांना मुंब्रा पोलिसांनी अटक केली आहे. त्या दोघांना शुक्रवारी ठाणे न्यायालयाने तीन दिवसांची पोलिस कोठडी सुनावली आहे.
मुंब्र्यात गुरुवारी गोळीबारात अकबर अब्दुल शेख यांचा उपचारादरम्यान मृत्यू झाला, तर तक्रारदार अब्दुल हसन शेख आणि समीर अहमद शेख हे गंभीर जखमी झाले होते. अब्दुल शेख याची प्रकृती चिंताजनक आहे. त्यांच्यावर मुंब्रा येथील रुग्णालयात उपचार सुरू आहेत. या घटनेनंतर पसार झालेल्या नायर आणि त्याच्या बहिणीला पोलिसांनी अटक केली. ते दोघे कोलकाता येथील मूळ रहिवासी असून ते मुंब्र्यात वास्तव्यास आहेत. पोलिस निरीक्षक राजू पाचोरकर यांच्या माहितीनुसार, शाळेच्या आवारातील केळीच्या झाडावरून वाद झाल्याचे तपासात समोर आले आहे. पुढील तपास वरिष्ठ पोलिस निरीक्षक अनिल शिंदे यांच्या मार्गदर्शनाखाली सुरू आहे.