तुर्भे, ता. ३ (बातमीदार) : नवी मुंबई महापालिकेच्या माध्यमातून अनेकवेळा उपमुख्यमंत्री एकनाथ शिंदे हे ठाणे जिल्ह्याचे पालकमंत्री असतानाही कार्यक्रम पत्रिकेत नाव टाकण्यात येत नाही. या प्रकाराचा निषेध करीत शिवसेनेचे नगरसेवक साहिल देविदास चौगुले आक्रमक झाले आहेत. सायन-पनवेल महामार्गावरील उड्डाणपुलाच्या गुरुवारी (ता. ३) पार पडलेल्या उद्‍घाटनाच्या कार्यक्रम पत्रिकेत उपमुख्यमंत्री शिंदेंचे नाव नसल्याने चौगुले आणि शिवसेना कार्यकर्त्यांनी पालिकेच्या विरोधात संताप व्यक्त करीत शिंदेंच्या नावाचा फलक उद्‍घाटनस्थळी लावला. राज्यात महायुतीत दिलजमाई असली तरी नवी मुंबईत शिवसेना आणि भाजप कार्यकर्ते आमने-सामने येणार असल्याचे दिसत आहे.

नगरसेवक साहिल चौगुले म्हणाले की, महापालिकेच्या माध्यमातून ७ मार्चला झालेल्या महिला दिनाच्या कार्यक्रम पत्रिकेत उपमुख्यमंत्री एकनाथ शिंदे यांचे नाव टाकण्यात आलेले नव्हते. इतकेच नाही, तर आजवर झालेल्या भूमिपूजन, नागरी कामांचे उद्‍घाटन कार्यक्रमात महापालिकेने शिंदे यांचे नाव टाकलेले नाही. मात्र, दुसरीकडे ऐरोलीचे आमदार, वनमंत्री गणेश नाईक हे ठाणे जिल्ह्याचे पालकमंत्री नसतानाही त्यांचे नाव विषय पत्रिकेत टाकून त्यांच्या हस्ते विविध प्रकल्पाचे उद्‍घाटन केले जाते. ठाणे महापालिकेच्या माध्यमातून होणाऱ्या कार्यक्रमामध्ये वनमंत्री गणेश नाईक यांची नावे टाकली जातात. त्यांचा कार्यक्रमात सन्मान केला जातो, परंतु नवी मुंबईत सुरू असणारा प्रकार केवळ कुरखोडी करण्याचा असून, प्रशासन दबावापोटी काम करत असल्याचे नगरसेवक चौगुले म्हणाले.

नवी मुंबई महापालिकेच्या वतीने वाशी सेक्टर-१७ येथे पाम बीच मार्गावरून पुण्याकडे जाण्याकरिता सायन-पनवेल महामार्गापर्यंत उड्डाणपुलाचा लोकार्पण सोहळा वनमंत्री गणेश नाईक यांच्या हस्ते पार पडला. या कार्यक्रमाच्या विषय पत्रिकेबरोबरच कोनशिलेमध्ये शिंदे यांचे नाव नसल्याने, तसेच त्यांना निमंत्रण न दिल्याने चौगुले यांनी आंदोलन करीत त्यांच्या नावाचा फलक उभारला. प्रशासनाने आपला कारभार वेळीच सुधारावा, अन्यथा शिवसेना अधिक आक्रमक होईल, असा इशारा चौगुले यांनी दिला आहे.