चार शिक्षकांविरोधात गुन्हा दाखल
उल्हासनगर, ता. ४ (वार्ताहर) ः उल्हासनगर महापालिकेतील निवडणूक प्रक्रियेत मोठी बेपर्वाई समोर आली आहे. मतदान केंद्रस्तरीय अधिकाऱ्यांकडून कामात कसूर झाल्याचा प्रकार उघड झाला आहे. याप्रकरणी सहाय्यक आयुक्त विशाल कदम यांनी चार शिक्षकांविरोधात गुन्हा दाखल केल्याने प्रशासनात खळबळ उडाली आहे. विशाल कदम यांनी दिलेल्या तक्रारीनुसार, १४१ उल्हासनगर विधानसभा मतदारसंघात नियुक्त करण्यात आलेल्या चार मतदान केंद्रस्तरीय अधिकाऱ्यांनी आपल्या कर्तव्यात मोठी कसूर केल्याचे उघड झाले आहे. या प्रकरणात चार शिक्षकांचा समावेश असून, त्यांना उपविभागीय अधिकारी विजयानंद शर्मा यांच्याकडून वारंवार कारणे दाखवा नोटीस देऊनही त्यांनी कोणताही प्रतिसाद दिला नाही. तसेच निवडणुकीसंदर्भातील बैठकांनाही गैरहजर राहिल्याचे तक्रारीत नमूद करण्यात आले आहे.