टिटवाळा महागणपती मंदिरात संकष्टीचा उत्साह
उन्हाच्या तडाख्यामुळे दुपारच्या सत्रात गर्दी ओसरली

टिटवाळा, ता. ५ (वार्ताहर) : संकष्ट चतुर्थीनिमित्त टिटवाळ्याच्या ऐतिहासिक महागणपती मंदिरात रविवारी (ता. ५) भाविकांनी बाप्पाच्या दर्शनासाठी हजेरी लावली. पहाटेपासूनच मंदिरात भक्तीचे वातावरण असले, तरी नेहमीच्या तुलनेत भाविकांची संख्या काहीशी कमी दिसून आली. वाढते ऊन आणि विद्यार्थ्यांच्या परीक्षांचा काळ यामुळे सकाळच्या सत्रात गर्दीवर परिणाम झाल्याचे चित्र पाहायला मिळाले.

सकाळच्या वेळी आलेल्या भाविकांनी उन्हाचा तडाखा जाणवण्यापूर्वीच शांततेत रांगेत उभे राहून दर्शन घेतले. मंदिराचा गाभारा फुलांनी आकर्षकरीत्या सजवण्यात आला असून, पुजाऱ्यांच्या वतीने विशेष अभिषेक आणि पूजाअर्चा करण्यात आली. भक्तांनी शिस्तबद्ध पद्धतीने नारळ, फुले आणि प्रसाद अर्पण करून बाप्पाचे आशीर्वाद घेतले.

उन्हाचा तडाखा
एप्रिल महिन्यातील वाढत्या तापमानामुळे अनेक भाविकांनी दुपारची वेळ टाळली आहे. तसेच शालेय आणि महाविद्यालयीन विद्यार्थ्यांच्या परीक्षा सुरू असल्याने कुटुंबांच्या उपस्थितीवर मर्यादा आल्या आहेत. दुपारच्या सत्रात भाविकांची संख्या मर्यादित असली, तरी मंदिर प्रशासनाने नियोजनात कोणतीही कसर सोडलेली नाही. पिण्याच्या पाण्याची सोय आणि रांगेचे चोख नियोजन करण्यात आले आहे. मंदिर परिसरात आणि रांगेत अनुचित प्रकार टाळण्यासाठी सुरक्षा रक्षक तैनात आहेत.