भाईंदर, ता. ५ (बातमीदार) : मिरा-भाईंदर महापालिकेच्या सहा प्रभाग समित्यांच्या सभापतिपदाच्या निवडणुकीत भाजपचे तीन उमेदवार बिनविरोध निवडून आले आहेत. उर्वरित तीन समित्यांच्या सभापतिपदासाठी प्रत्येकी दोन उमेदवार रिंगणात असल्याने त्यासाठी निवडणूक पार पडणार आहे.

सहा समित्यांच्या सभापतिपदासाठी मंगळवारी (ता. ७) निवडणूक होणार आहे. त्यापैकी प्रभाग एक, दोन व तीनसाठी केवळ भाजपकडून उमेदवारी अर्ज आल्याने अनुक्रमे भाजपच्या वर्षा भानुशाली, सुनीता जैन व मदन सिंह यांची सभापती म्हणून बिनविरोध निवड होणार आहे. प्रभाग चारच्या सभापतिपदासाठी भाजपचे संजय थेराडे यांच्याविरुद्ध कॉँग्रेसच्या सना देशमुख, समिती पाचसाठी भाजपचे दिनेश जैन विरुद्ध कॉँग्रेसचे अश्रफ मिस्त्री व समिती सहासाठी भाजपचे प्रशांत दळवी विरुद्ध कॉँग्रेसच्या आयरीन कॉड्रस अशी लढत होणार आहे; मात्र तिन्ही समित्यांमध्ये भाजपचेच संख्याबळ अधिक असल्याने भाजपचे उमेदवार निवडून येणार, हे निश्चित आहे. त्यामुळे सर्व सहा प्रभाग समित्या भाजपच्याच ताब्यात जाणार आहेत.