मुरबाड, ता. ५ (वार्ताहर) : तालुक्यातील कोरावळे गावाच्या हद्दीत दत्तात्रेय खाटेघरे यांच्या शेतावरील बेड्यावर बिबट्याने हल्ला करून वासरू ठार केल्याची घटना शनिवारी रात्रीच्या सुमारास घडली. या घटनेमुळे कोरावळे परिसरातील नागरिकांमध्ये भीतीचे वातावरण निर्माण झाले आहे. घटनेची माहिती मिळताच सरळगाव परिमंडळातील वन विभागाचे पथक तातडीने घटनास्थळी दाखल झाले. यामध्ये वनपाल टी. एन. भांगरे, वनरक्षक ए. बी. घोलप, के. एस. मस्के आणि एल. आर. रहाडे यांनी परिस्थितीची पाहणी केली. दत्तात्रेय यांच्या शेतातील बेड्यावर असलेल्या वासरावर हिंस्र प्राण्याने हल्ला केल्याने मृत्यू झाल्याचे स्पष्ट झाले. वन विभागाच्या कर्मचाऱ्यांनी प्रत्यक्षस्थळी पंचनामा करून संबंधितांचा जबाब नोंदविला. दरम्यान, पशुवैद्यकीय अधिकारी, मुरबाड यांच्यामार्फत वासराचे शव विच्छेदन करण्यात आले. कोरावळे गावातील नागरिकांना सतर्क राहण्याच्या आणि आवश्यक ती खबरदारी घेण्याच्या सूचना वन विभागाकडून देण्यात आल्या आहेत.