तारापूरमध्ये पुन्हा वायूगळती
कामगारांना श्वसनाचा त्रास, भीतीचे वातावरण
बोईसर, ता.६ (वार्ताहर): तारापूर औद्योगिक क्षेत्रातील डी-प्लॉट परिसरात रविवार सायंकाळी वायूगळती झाली होती. या प्रकारामुळे अनेक कारखान्यांतील कामगारांना श्वसनाचा त्रास, डोळ्यांची जळजळ जाणवली.
काही दिवसांपूर्वी भगेरिया, आरती फार्मा लॅब येथे अशाच प्रकारच्या घटना घडल्या होत्या. त्यानंतर परिसरात पुन्हा वायूगळती झाल्याने कामगारांमध्ये भीतीचे वातावरण आहे. आयव्हीपी लिमिटेड (डी-१९/२०) येथील एका कामगाराला गॅसचा त्रास जाणवल्याने बोईसर येथील हॉस्पिटलमध्ये दाखल करण्यात आले. प्राथमिक उपचारानंतर त्याची प्रकृती स्थिर आहे. घटनेनंतर अग्निशमन दल, पोलिसांनी कारखान्यांची पाहणी केली. मात्र, वायूगळतीचे नेमके कारण, ठिकाण स्पष्ट होऊ शकलेले नाही.