२३० मुलींचे भवितव्य अंधारात
कस्तुरबा गांधी बालिका विद्यालयातील कर्मचाऱ्यांची सेवासमाप्ती

जव्हार, ता. ७ (बातमीदार) ः तालुक्यातील कस्तुरबा गांधी बालिका विद्यालयातील १५ शिक्षक, शिक्षकेतर तसेच कंत्राटी कर्मचाऱ्यांची सेवा समाप्ती केली आहे. या निर्णयामुळे २३० मुलींचे भवितव्य धोक्यात आले आहे.
शिक्षण व्यवस्थेला बळकटी देण्यासाठी, समाजातील शेवटच्या घटकाला मुख्य प्रवाहात आणण्याच्या उद्देशाने समग्र शिक्षा अभियानांतर्गत २००३ मध्ये डेटा एन्ट्री ऑपरेटर, विशेष शिक्षक, कनिष्ठ सहाय्यक, गृहपाल, लेखापाल, समन्वयक अशा विविध १५ पदांवर कंत्राटी तत्त्वावर कर्मचारी भरण्यात आले होते. या विभागात अनेकांनी २० ते २३ वर्षे सेवा दिली आहे. दरवर्षी एक महिन्याचा सेवाखंड देऊन त्यांना पुनर्नियुक्ती दिली जात असे; मात्र यंदा महाराष्ट्र प्राथमिक शिक्षण परिषदेच्या प्रकल्प संचालकांनी सेवा समाप्तीबाबत पालघर जिल्हा परिषदेला पत्र दिल्याने पन्नाशीत पोहोचलेल्या कर्मचाऱ्यांच्या कुटुंबाचा उदरनिर्वाहाचा प्रश्न निर्माण झाला आहे.
--------------
मागण्यांसाठी आंदोलन
या योजनेमध्ये आयडी विभागातील तीन हजार कर्मचाऱ्यांना शासनाने सेवेत सामावून घेतले आहे. तर कस्तुरबा शाळेमध्ये मुलींच्या शिक्षणाचा दर्जा सुधारण्यासाठी नियुक्त केलेल्या कर्मचाऱ्यांच्या सेवासमाप्तीचे आदेश दिले आहेत. यामुळे सर्व कर्मचाऱ्यांनी मुंबईतील आझाद मैदान मुंबई येथे उपोषणाचा मार्ग स्वीकारला आहे.
-------------------------
कस्तुरबा गांधी बालिका विद्यालयातील शिक्षक, शिक्षकेतर कर्मचाऱ्यांना सेवा समाप्तीची नोटीस दिली आहे. त्याबाबत शिक्षण विभागाकडून माहिती घेऊन वरिष्ठ कार्यालयास कळवले जाईल.
- अक्षय पगार, गटविकास अधिकारी, जव्हार