डम्परखाली चिरडून चिमुकलीचा मृत्‍यू
मालाड, ता. ७ (बातमीदार) ः चारकोप गणेशनगर, मणिहार चाळ येथे राहणाऱ्या सहा वर्षांच्या चिमुकलीचा डम्परखाली आल्याने दुर्दैवी मृत्यू झाल्याची घटना आज (ता. ७) दुपारी घडली. शाळेतून घरी परतत असताना तिचा अपघात झाल्‍याचे समोर आले.
घटनेनंतर तातडीने चिमुकलीला पालिकेच्या रुग्णालयात नेण्यात आले. मात्र, दाखल करण्यापूर्वीच तिचा मृत्यू झाल्याचे डॉक्टरांनी घोषित केले. घटनेची माहिती मिळताच पोलिसांनी घटनास्थळी धाव घेत अपघाती गुन्हा नोंदवला असून, पुढील तपास सुरू आहे. संबंधित डम्पर हा एका विकसकाचा असल्याची प्राथमिक माहिती समोर येत आहे.
मृत मुलगी चारकोप गणेशनगर येथील मणिहार चाळ येथे वास्तव्यास होती. या घटनेमुळे परिसरात हळहळ व्यक्त केली जात आहे.
या दुर्घटनेनंतर स्थानिक नागरिकांमध्ये संतापाचे वातावरण असून, संबंधित डम्परचालकावर कडक कारवाई करण्याची मागणी करण्यात येत आहे.

कठोर कारवाई करा
स्थानिक सर्वपक्षीय नेत्यांनी या घटनेचा तीव्र निषेध व्यक्त केला आहे. पोलिस उपायुक्तांना पत्र देऊन सखोल तपास करून दोषींवर कठोर कारवाई करण्याची मागणी करण्यात
आली आहे.