मंडाळे-डायमंड गार्डन २० रुपयांत गारेगार प्रवास
मेट्रोच्या पहिल्या दोन स्थानकांसाठी १० रुपये तिकीट

सकाळ वृत्तसेवा
मुंबई, ता. ७ : एमएमआरडीएकडून लोकार्पण करण्यात आलेली मेट्रो-२बी मंडाळे-डायमंड गार्डन आणि मेट्रो-९ दहिसर-काशीगाव या टप्प्यात बुधवारी सकाळ ५.५५ वाजल्यापासून मुंबईकरांना अवघ्या १०-२० रुपयांत गारेगार मेट्रो प्रवास करता येणार आहे. ऐन उन्हाळ्यातच दोन मेट्रो मार्ग सुरू झाल्याने प्रवाशांना मोठा दिलासा मिळणार आहे.
मेट्रोच्या मंडाळे-डायमंडदरम्यानच्या प्रवासासाठी पहिल्या दोन स्थानकांसाठी १० रुपये तिकीट आहे. तर डायमंड गार्डनपर्यंत २० रुपयांत प्रवास करता येणार आहे. दहिसर-काशीगाव या प्रवासासाठीही १०-२० रुपये एवढे तिकीट असणार आहे. तर गुंदवली-काशीगाव या प्रवासाठी ५० रुपये मोजावे लागणार आहेत. त्यामुळे घामाघूम होऊन लोकल ट्रेन, बेस्ट बसने प्रवास करणाऱ्या चेंबूर, देवनार, मानखुर्द, मिरा रोड, भाईंदर, काशीगाव परिसरातील रहिवाशांना मोठा दिलासा मिळणार आहे.