उन्हाळी प्रशिक्षण ‍शिबिराचे आयोजन

पालघर, ता. ९ (बातमीदार) : उन्हाळी सुट्टीच्या काळातील खेळाडूंच्या अंगी असलेल्या सुप्त कलागुणांना वाव देण्यासाठी जिल्हा क्रीडा अधिकारी यांच्या वतीने उन्हाळी क्रीडा प्रशिक्षण शिबिराचे आयोजन २० ते ३० एप्रिल या कालावधीमध्ये करण्याचे निश्चित झाले आहे.
या प्रशिक्षण शिबिरामध्ये आठ ते १४ वयोगटातील खेळाडूंना प्रवेश दिला जाणार असून देशी व विदेशी प्रकारचे मैदानी खेळ, बॅडमिंटन, सॉफ्टबॉल, कबड्डी, खो-खो इत्यादी खेळांचे प्रशिक्षण ज‍िल्हा क्रीडा संकुल, पालघर येथे देण्यात येणार आहे. या शिबिराचे आयोजन ज‍िल्हाध‍िकारी तथा जिल्हा क्रीडा परिषद अध्यक्षा डॉ. इंदुराणी जाखड यांच्या प्रेरणेने व मार्गदर्शनाखाली आयोजित केले जाणार असून या शिबिरासाठी तज्ज्ञ प्रशिक्षक यांच्यामार्फत खेळांडूना मार्गदर्शन देण्यात येणार आहे. हे प्रश‍िक्षण शिबिर पूर्णपणे व‍िनामूल्य असून १५ ते २० एप्रिलपर्यंत इच्छुक विद्यार्थ्यांनी सहभागी होण्यासाठी आपली नावनोंदणी करावयाची आहे. तसेच प्रशिक्षणासाठी येताना दोन फोटो, आधार कार्ड, रहिवासी दाखला, बोनाफाईड दाखला आणावयाचे असून क्रीडा अधिकाऱ्यांशी संपर्क साधण्याचे आवाहन ज‍िल्हा क्रीडा अधिकारी सुहास व्हनमाने यांनी केले आहे.