पाळीव प्राण्यांवर बिबट्याचे हल्ले
बोईसर परिसरात दहशतीचे वातावरण

बोईसर, ता. १० (वार्ताहर) : पास्थळ, छाया निवास, गॅसवाडी परिसरात काही दिवसांपासून सातत्याने बिबट्याचे हल्ले होत आहेत. तर पाळीव श्वानासह गाईचा बिबट्याने फडशा पाडला असल्याने ग्रामस्थ दहशतीत आहेत.
दाट झाडीझुडपांचा आडोसा, मोकळे भूखंडामुळे बिबट्याला सुरक्षित वावर मिळत आहे. यापूर्वीही या भागात बिबट्याचे दर्शन झाले होते; मात्र, आता थेट मानवी वस्तीतील हल्ल्यांमुळे परिस्थिती गंभीर झाली आहे. घटनेचे गांभीर्य लक्षात घेता पास्थळ ग्रामपंचायतीने परिसरात फलक लावून नागरिकांना सतर्क केले आहे. तसेच लहान मुलांना एकटे सोडणे, रात्री बाहेर पडणे तसेच पाळीव प्राण्यांची काळजी घेण्याचे आवाहन केले आहे.
-----------------------
जेरबंद करा
वाढत्या धोक्याच्या पार्श्वभूमीवर वनविभागाने तातडीने ट्रॅप कॅमेरा लावून बिबट्याचा शोध घ्यावा. तसेच पिंजरा उभारून त्याला जेरबंद करावे, अशी मागणी ग्रामस्थांकडून होत आहे.