भिवंडी (वार्ताहर) : भिवंडी-निजामपूर शहर महापालिकेतर्फे महात्मा ज्योतिबा फुले यांच्या द्विशतक जयंती व डॉ. बाबासाहेब आंबेडकर यांच्या १३५व्या जयंतीनिमित्त सामाजिक समता सप्ताहाला सुरुवात झाली. पालिका मुख्यालयात अतिरिक्त आयुक्त नयना ससाणे यांनी फुले, आंबेडकर व संत गाडगेबाबा यांच्या प्रतिमांना पुष्पहार अर्पण करून अभिवादन केले. या वेळी उपायुक्त विक्रम दराडे, सपना वसावा, मुख्य लेखा वित्त अधिकारी रामप्रसाद सोळुंके, सहाय्यक आयुक्त शैलेश दोंदे आदी अधिकारी उपस्थित होते. सप्ताहनिमित्त जादूगार महेंद्र सोनवणे यांच्या सौजन्याने संविधानातील विविध कलमांचे छायाचित्र प्रदर्शन घेण्यात आले. या आठवड्यात रक्तदान शिबिर, आरोग्य तपासणी, स्वच्छता अभियान; तसेच कवयित्री सुरेख पैठणे व डॉ. कैलास गायकवाड यांची मार्गदर्शनपर व्याख्याने होणार असल्याची माहिती प्रशासनाने दिली.