सकाळ वृत्तसेवा
डोंबिवली, ता. १२ : कल्याण-मलंगगड रोडवरील आडिवली-ढोकळी परिसरात घरखरेदीच्या प्रलोभनात पालघर जिल्ह्यातील एका महिलेची सुमारे पाच लाख रुपयांची फसवणूक झाल्याचा प्रकार उघडकीस आला आहे. पैसे परत मागितल्यावर संबंधित महिलेला हात-पाय तोडण्याच्या धमक्या दिल्याने परिसरात खळबळ उडाली आहे. याप्रकरणी मानपाडा पोलिस ठाण्यात गुन्हा दाखल करण्यात आला आहे.
तक्रारदार कविता यादव (४१, रा. मनोर, पालघर) यांना आडिवली-ढोकळी परिसरात चाळीमध्ये खोली खरेदी करायची होती. ओळखीतील संतोष यादव, ब्रिजेश यादव, सुनील यादव, कृष्णा यादव आणि रणजीत सिंग यांनी त्या भागात बांधकाम सुरू असल्याचे सांगत खोली व गाळा विक्रीचे प्रलोभन दाखवले. त्यावर विश्वास ठेवून तक्रारदार महिलेने रोख व धनादेशाद्वारे एकूण पाच लाख रुपये दिले. मात्र, त्यानंतर खोलीचा ताबा देण्याबाबत टाळाटाळ सुरू झाली. वारंवार पाठपुरावा करूनही प्रतिसाद न मिळाल्याने महिला पतीसह संबंधितांकडे गेली असता, त्यांना शिवीगाळ करण्यात आली. तसेच, पुन्हा पैशांची मागणी केल्यास गंभीर परिणाम भोगावे लागतील, अशा धमक्या दिल्याचे तक्रारीत नमूद आहे.
घराचा ताबा व पैसे दोन्ही न मिळाल्याने अखेर महिलेने पोलिसांकडे धाव घेतली. पोलिसांनी पाच जणांविरुद्ध फसवणुकीचा गुन्हा दाखल केला असून, पुढील तपास सहाय्यक पोलिस निरीक्षक संदीप गोरे करत आहेत.