नवीन पनवेलमध्ये भीमोत्सव
डॉ. बाबासाहेब आंबेडकर यांच्या जयंतीनिमित्त कार्यक्रम
कामोठे, ता. १३ ( बातमीदार) : नवीन पनवेल येथे भारतरत्न डॉ. बाबासाहेब आंबेडकर यांच्या जयंतीनिमित्त सहा दिवसांचा भीमोत्सव मोठ्या उत्साहात आयोजित करण्यात आला आहे. भाजप व जयंती उत्सव समिती तसेच विविध सामाजिक संस्थांच्या वतीने १० ते १५ एप्रिलदरम्यान हा उत्सव साजरा होत आहे.
या भीमोत्सवात मुलांसाठी चित्रकला स्पर्धा, मैदानी खेळ, महिलांसाठी संगीत खुर्ची व खेळ पैठणी, तसेच ज्येष्ठ नागरिकांचा सन्मान सोहळा अशा विविध कार्यक्रमांचे आयोजन करण्यात आले आहे. मंगळवारी सकाळी धम्म ध्वजारोहण, प्रवचन व स्नेहभोजनाचा कार्यक्रम बिनेदार कॉर्नर येथे होणार आहे.
सायंकाळी गायक आनंद शिंदे यांचा ‘शिंदेशाही बाणा’ हा भीमगीतांचा कार्यक्रम आणि बुधवारी साजन विशाल यांचा विशेष गायन कार्यक्रम सेक्टर २ येथे होणार आहे. या भीमोत्सवाला नागरिकांनी मोठ्या संख्येने उपस्थित राहावे, असे आवाहन आयोजक ॲड. प्रकाश बिनेदार यांनी केले आहे.