सकाळ वृत्तसेवा
ठाणे, ता. १३ : वागळे इस्टेट परिसरात कचरा टाकण्याच्या किरकोळ कारणावरून शेजाऱ्याने दोन भावंडांवर लाकडी बांबूने हल्ला केल्याची घटना समोर आली आहे. याप्रकरणी वागळे इस्टेट पोलिस ठाण्यात गुन्हा दाखल करण्याची प्रक्रिया सुरू आहे.
जखमी तथा तक्रारदार मेहबुब अब्बास अली खान (वय ३०) हे कुटुंबासह वागळे इस्टेट परिसरातील नेहरूनगर येथे वास्तव्यास आहे. ते रविवारी (ता. १३) मध्यरात्रीच्या सुमारास कामावरून घरी आले असता शेजारी गोविंद प्रसाद यांची मुलगी घरासमोर कचऱ्याचा डबा घेऊन खेळत होती. कचरा सांडत असल्याने मेहबुब यांनी तिला तेथे खेळू नये, असे सांगितले. याच कारणावरून काही वेळातच गोविंद प्रसाद हा संतप्त झाला. त्याने मेहबुब यांना शिवीगाळ करत मारहाण केली. झटापटीदरम्यान त्याने लाकडी बांबूने मेहबुब यांच्या डोक्यावर प्रहार केला. मदतीला आलेल्या त्यांचा भाऊ यासिन यालाही मारहाण करण्यात आली. दोघांनाही रुग्णालयात दाखल करण्यात आले आहे. याप्रकरणी वागळे इस्टेट पोलिस ठाण्यात गुन्हा दाखल केला असून पुढील तपास सुरू आहे.