तुर्भे येथील संत रामतनुमाता संवाद केंद्राची स्वच्छता
तुर्भे, ता. १३ (बातमीदार) : तुर्भे येथील संत रामतनुमाता संवाद केंद्राची अस्वच्छता आणि अन्य कारणांमुळे दुरवस्था झाली होती. अशी बातमी प्रसिद्ध झाली होती. याची नोंद घेत तुर्भे विभाग कार्यालयातील स्वच्छता अधिकारी जयेश पाटील यांनी त्वरित या ठिकाणची स्वच्छता करून घेतली. तसेच एपीएमसी पोलिस ठाण्याचे वरिष्ठ पोलिस निरीक्षक अजय शिंदे यांनी या ठिकाणी सार्वजनिक ठिकाणे मद्यप्राशन करणाऱ्यांवर कडक कारवाई करण्याचे आदेश दिले आहेत.
या संवाद केंद्रामध्ये कोणतेही विशेष कार्यक्रम होत नाहीत. या केंद्राच्या समोरच देशी दारूचे दुकान आहे. परिणामी रात्रीच्या वेळी मद्यपी या केंद्रामध्ये दारू पिऊन गोंगाट घालत असतात. तसेच अनेकदा या ठिकाणी ते लघुशंकाही करत असतात. त्यामुळे या ठिकाणी दारूच्या बाटल्या, गुटख्याची पाकिटे पडलेली होती. तसेच दुर्गंधी पसरली होती. या ठिकाणच्या लाद्या ठिकठिकाणी तुटल्या आहेत. नियमित स्वच्छतेचादेखील या ठिकाणी अभाव होता.
ही बातमी प्रसिद्ध होताच स्वच्छता अधिकारी जयेश पाटील यांनी त्वरित स्वच्छता पथकाला येथे पाठवून त्वरित सर्व स्वच्छता करून घेतली. तसेच नियमितपणे या ठिकाणी नियमित स्वच्छता राखण्याचे आदेश संबंधित ठेकेदाराला दिले. पुन्हा या ठिकाणी अस्वच्छता आढळून आली, तर ठेकेदारावर कडक कारवाई करण्यात येईल, असे पाटील यांनी सांगितले.
दरम्यान, येथील स्थापत्य दुरुस्ती विषयी तुर्भे विभागातील अभियंतांनी हात वर केले असून, विभाग अधिकाऱ्यांच्या कोर्टात चेंडू टोलवला आहे. विभाग अधिकाऱ्यांनी याविषयी कोणताही प्रतिसाद दिला नाही.