किरकोळ वादातून चौघांना मारहाण
बोईसर, ता.१४ (वार्ताहर): साईलोकनगर परिसरात किरकोळ कारणावरून दांडक्यांनी जबरी मारहाण केल्याचा प्रकार घडला आहे. या हल्ल्यात महिला, तिचा पती, भांडण सोडविण्यासाठी धावलेल्या दोघांसह चौघे जखमी असून परिसरात भीतीचे वातावरण आहे.
गणेशनगर येथील साईलोकनगरमध्ये रविवारी (ता.१२) रात्री ८ च्या सुमारास घटना घडली. फिर्यादी नितुदेवी दीपेंद्र ठाकुर घराबाहेर स्वयंपाक करत असताना शेजारील सुरज वेणुप्रसादने शिवीगाळ सुरू केली. तर वाद मिटवण्यासाठी आलेल्या शेखर झा यांना दांडक्याने मारहाण केली, तर संदीप झाला ठोश्याबुक्क्यांनी मारहाण करून जखमी करण्यात आले. या प्रकरणी बोईसर पोलिसांनी सुरज वेणुप्रसाद याच्यासह तिघांविरोधात विविध कलमान्वये गुन्हा दाखल केला आहे.