वाढदिवसाचा आनंद समाजसेवेतून साजरा
कासा (बातमीदार) ः वाढदिवसाला केक, पार्टी, जल्लोष अशी पारंपरिक संकल्पना असते. मात्र युवा एल्गार आघाडीचे संस्थापक अध्यक्ष तथा शिवसेना पालघर विधानसभा संघटक अॅड. विराज गडग यांनी ३७ व्या वाढदिवस सामाजिक उपक्रमांनी साजरा केला आहे. यावेळी सलग चौथ्या वर्षी रक्तदान शिबिरात ३० रक्तदात्यांनी सहभाग नोंदवत रक्तदान केले. जव्हार कुटीर रुग्णालयातील डॉक्टरांनी शिबिरासाठी विशेष उपस्थिती दर्शवत सहकार्य केले. तर आरोग्य शिबिरात कान, नाक, घसा, पोटाचे विकार, सिकलसेल तसेच इतर विविध आजारांची तज्ज्ञांकडून तपासणी करण्यात आली. डोळ्यांची तपासणी तसेच किडनी स्टोनसारख्या समस्यांचे निदान केले. गरजूंना शस्त्रक्रियेबाबत मार्गदर्शन केले.