‘सक्षमीकरण’ मोहिमेत महिलांनी सहभागी होण्याचे आवाहन

पालघर, ता. १४ (बातमीदार) : महाराष्ट्र शासनाच्या माहिती व जनसंपर्क महासंचालनालयामार्फत गुरुवार (ता. ९) पासून पुढील १५ दिवस ‘महिला सक्षमीकरण’ मोहिमेअंतर्गत व्यापक प्रसिद्धी अभियान राबविण्यात येत आहे. या मोहिमेचा मुख्य उद्देश केंद्र व राज्य शासनाच्या महिलाभिमुख योजनांची माहिती तळागाळापर्यंत पोहोचवणे आणि लाभार्थ्यांच्या यशोगाथांना व्यासपीठ मिळवून देणे हा आहे.

पालघर जिल्ह्यातील ज्या महिलांनी शासनाच्या विविध योजनांचा महिला बचत गट, कौशल्य विकास, अर्थसहाय्य योजना इत्यादी लाभ घेऊन आपले जीवन समृद्ध केले आहे, अशा महिला तसेच शासन सेवेत उल्लेखनीय कामगिरी करणाऱ्या कर्तृत्ववान महिला यांनी आपली माहिती, फोटो किंवा छोटे व्हिडिओ जिल्हा माहिती कार्यालय, पालघर यांच्याकडे पाठवावेत, असे आवाहन जिल्हा माहिती कार्यालय, पालघर यांनी केले आहे. तसेच प्रशासनाने या महिलांना आपल्या यशकथा जिल्हा माहिती कार्यालयाच्या ईमेलवर पाठण्यास सांगितले आहे. या यशकथा स्थानिक वृत्तपत्रे, आकाशवाणी, सामाजिक माध्यमे आणि डिजिटल ई-बुकलेटच्या माध्यमातून राज्यस्तरावर प्रसिद्धी दिली जाणार आहे. महिलांच्या कर्तृत्वाला सलाम करण्यासाठी आणि इतर महिलांना प्रोत्साहित करण्यासाठी या मोहिमेत मोठ्या संख्येने सहभागी व्हावे, असे आवाहन जिल्हा माहिती अधिकारी राहुल भालेराव यांनी केले आहे.