सकाळ वृत्तसेवा
ठाणे, ता. १४ : ठाणे पश्चिमेतील मानपाडा परिसरातील सुमीत सोसायटीसमोरील रस्त्यावर वाहनधारकांकडून बेकायदा पार्किंग केली जात आहे. ‘नो पार्किंग’चा फलक असतानाही रस्त्याच्या दुतर्फा वाहने उभी असल्याने सोसायटीतील रहिवाशांनी आक्रमक भूमिका घेतली आहे.
सोसायटीकडे जाणाऱ्या अँप्रोच रस्त्यावर ॲक्मे सोसायटीतील अनेक वाहनधारकांनी चारचाकी वाहने दुतर्फा उभी केली आहे. परिणामी, परिसरात दररोज वाहतूक कोंडी होत आहे. याचा रहिवाशांना मोठा त्रास सहन करावा लागत आहे. आपत्कालीन परिस्थितीत रुग्णवाहिका आणि अन्य सेवा वाहनांना प्रवेश करणेही कठीण होत असल्याची तक्रार रहिवाशांनी केली आहे. या ठिकाणी ठाणे वाहतूक पोलिसांनी ‘नो पार्किंग’चा फलक लावलेला असतानाही नियमांचे उल्लंघन होत आहे. तक्रार मिळताच वाहतूक पोलिसांनी बेकायदा पार्किंग करणाऱ्या वाहनांवर दंडात्मक कारवाई केली. मात्र, या कारवाईनंतर काही वाहनधारकांनी स्थानिक समाजसेवकांकडे धाव घेत विरोध दर्शविल्याने दोन सोसायट्यांमध्ये वाद निर्माण झाला आहे.
दरम्यान, कायदा व सुव्यवस्था अबाधित ठेवण्यासाठी सुमीत सोसायटीच्या रहिवाशांनी ठाणे महापालिका आणि पोलिस प्रशासनाकडे अधिक कठोर कारवाईची मागणी केली आहे.