नवरदेवाच्या दागिण्यांवर वधुचा डल्ला
मिरारोड येथील घटना, महिलेसह दोघांना अटक
भाईंदर, ता.१५ (बातमीदार): वधू बनून नवरदेवाच्या घरातील सोन्याचांदीचे दागिने, किंमती ऐवज चोरल्याची घटना मिरारोड येथे घडली. या प्रकरणी पोलिसांनी एका महिलेसह दोघांना अटक केली.
मिरा रोड येथे राहाणारे सेवलकुमार नाडर यांना लग्न करायचे होते. त्याची माहिती काढून केसरीमल रांकाने नाडर यांना लग्नाकरीता मुलगी असल्याचे सांगून महिलेची छायाचित्रे पाठवली. त्यानंतर लग्न लावून देण्याकरीता नाडर यांच्याकडून विविध बँकेच्या खात्यावर ४४ हजार ७५० रुपये घेण्यात आले. तसेच लग्नानंतर घरातील ४ लाख ७६ हजारांचे सोन्याचे दागिने, लॅपटॉप चोरला होता. या प्रकरणात तक्रार दाखल झाल्यानंतर पोलिसांनी गुन्ह्यातील महिला आरोपी नेहा खंडेलवाल ऊर्फ जन्नत, केसरीमल रांका यांना सोमवारी (ता.१३) अटक केली. या दोघांवर संगमनेर, अहिल्यानगर, मुंबईतील जोगेश्वरी, बोरीवली, जळगाव येथील पाचोरा येथे अशा प्रकारच्या गुन्ह्याची नोंद आहे.