कॉईल घेऊन जाणारा ट्रेलर वळणावर बंद
रोहा, ता. १५ (बातमीदार) ः कोलाड-भिरा फाट्यावरून विळे भागाड एमआयडीसीकडे अवजड कॉईल घेऊन जाणारा एक ट्रेलर दुरटोळी गावाच्या फाट्यावरील वळणावर बंद पडला आहे. यामुळे या मार्गावरील वाहतुकीचा मोठा खोळंबा झाला असून, वाहनचालकांना जीव मुठीत धरून प्रवास करावा लागत आहे. विशेष म्हणजे, गेल्या १५ दिवसांतील ही तिसरी घटना असल्याने स्थानिक नागरिकांमध्ये तीव्र संताप व्यक्त होत आहे. विळे भागाड एमआयडीसी मार्गावरील भिरा फाटा ते सुतारवाडी परिसरात अवजड कॉईल वाहतूक करणारे ट्रेलर धावत असतात. विशेष म्हणजे हे ट्रेलर वारंवार बंद पडण्याच्या घटना घडत आहेत. वाळंजवाडी, दुरटोळी, ढोकळेवाडी अशा वळणावरील ठिकाणीच ट्रेलर बंद पडल्याने इतर वाहन चालकाला रात्री या मार्गावरून प्रवास करताना जीव मुठीत धरुन प्रवास करावा लागतो.

फोटो कॅप्शन.
अवजड कॉइल घेऊन जाणारा ट्रेलर दुरटोली वळणावर बंद अवस्थेत उभा आहे.