भिवंडी (वार्ताहर) : मुंबई येथील लक्ष्मी शैक्षणिक संस्थेतर्फे २०२५-२६ या वर्षासाठीचा मानाचा ‘साने गुरुजी पुरस्कार’ जाहीर करण्यात आला आहे. भिवंडीतील जनरल एज्युकेशन इन्स्टिट्यूट संचलित प. रा. विद्यालयाचे शिक्षक; एनसीसी व आरएसपी अधिकारी नीलेश शंकर नरवडे यांना हा पुरस्कार प्रदान करण्यात आला. उच्च व तंत्रशिक्षण विभागाचे अवर सचिव प्रवीण मुंढे यांच्या हस्ते नरवडे यांना सन्मानित करण्यात आले. विद्यार्थ्यांमध्ये शिस्त, देशप्रेम आणि सामाजिक बांधिलकी निर्माण करण्यासाठी एनसीसी व आरएसपीच्या माध्यमातून त्यांनी केलेले कार्य विशेष उल्लेखनीय ठरले आहे. त्यांच्या शैक्षणिक व सामाजिक क्षेत्रातील योगदानाची दखल घेत हा पुरस्कार बहाल केला. या यशाबद्दल शाळेचे अध्यक्ष प्रदीप राका, मुख्याध्यापिका नंदा कोंगे, शिक्षकवर्ग, विद्यार्थी; तसेच पालकांनी त्यांचे अभिनंदन केले आहे.