कोंडीमुक्त भाईंदरसाठी महापौरांचा पुढाकार
भाईंदर, ता. १७ (बातमीदार) : मिरा-भाईंदर शहरातील वाहतूक कोंडीची समस्या सोडविण्यासाठी महापौर डिंपल मेहता यांनी पोलिस विभाग, महापालिकेची संयुक्त बैठक घेतली. या बैठकीत वाहतूक कोंडी, बेवारस वाहने, अनधिकृत पार्किंगसारख्या प्रमुख मुद्द्यांवर महत्त्वाचे निर्णय घेण्यात आले.
शहरात दररोज वाढणारी वाहने, रस्त्यावर होत असलेली फेरीवाल्यांची अतिक्रमणे, पार्किंग, नो पार्किंग धोरणाची प्रभावी होत नसलेली अंमलबजावणी, पार्किंग क्षेत्राचा अभावामुळे नागरिकांना कोंडीच्या समस्येला सामोरे जावे लागत आहे. या पार्श्वभूमीवर नो-पार्किंग झोनमध्ये उभ्या राहणाऱ्या वाहनांवर त्याचप्रमाणे अनधिकृतरीत्या पार्किंग करणाऱ्या जड व अवजड वाहनांवर तसेच शहरातील व शहराच्या बाहेरून येऊन पार्किंग केलेल्या बसवर कारवाईचा निर्णय घेण्यात आला. तसेच सात नव्या ठिकाणी सिग्नल उभारणे, पे अँड पार्क योजनेसाठी पालिकेकडून जागा उपलब्ध करून देणे, काशी मिरा येथील ऑक्ट्रॉय नाक्याची जागा पार्किंगसाठी वापरणेबाबत निर्णय घेण्यात आला.