पावसाळ्यासाठी महावितरण सज्ज
दुर्गम भागात अखंडित वीजपुरवठ्याची तयारी

मोखाडा, ता. १९ (बातमीदार) ः जव्हार, मोखाडा तालुक्यांचा पावसाळ्यात वीजपुरवठा सुरळीत राहावा, म्हणून महावितरणने कंबर कसली आहे. याच अनुषंगाने विजेच्या तारांवर येणाऱ्या झाडांच्या फांद्या, गंजलेले खांब बदलण्याची मोहीम हाती घेतली असून अखंडित वीजपुरवठ्याची तयारी सुरू आहे.
जव्हार, मोखाड्याला डहाणूच्या विद्युत केंद्रातून सूर्यानगर, गंजाड उपकेंद्राच्या माध्यमातून अडथळ्यांची शर्यत पार करून वीजपुरवठा करण्यात येतो. या उपकेंद्रात काही बिघाड झाल्यास दोन्ही तालुक्यांचा विद्युत पुरवठा खंडित होतो. पावसाळ्यात वादळामुळे खांब कोसळण्याच्या घटना घडतात. त्याच्या दुरुस्तीसाठी महावितरणच्या कर्मचाऱ्यांना जंगल पायदळी तुडवावे लागते. त्यामुळे पावसाळा सुरू होण्यापूर्वीच डहाणूपासून मोखाड्यापर्यंतची वीज दुरुस्तीची कामे हाती घेण्यात आली आहेत.