महिला आरक्षणाच्या मुद्द्यावर काँग्रेसविरोधात आंदोलन
तुर्भे, ता. २० (बातमीदार) : देशातील महिलांना संसद आणि राज्य विधानसभांमध्ये ३३ टक्के राजकीय आरक्षण मिळावे, या मागणीच्या समर्थनार्थ तसेच महिला आरक्षणाच्या प्रश्नावर काँग्रेसने घेतलेल्या भूमिकेच्या निषेधार्थ बेलापूर विधानसभा क्षेत्रातील शिवसेना महिला आघाडीच्या वतीने शनिवारी (ता. १८) सीबीडी येथे आंदोलन करण्यात आले.
हे आंदोलन शिवसेनेच्या महिला जिल्हाप्रमुख सरोज पाटील यांच्या नेतृत्वाखाली पार पडले. या आंदोलनात सीबीडी महिला विभागप्रमुख दिपाली घोलप, उपजिल्हाप्रमुख मथुरा पाटील, उपशहर प्रमुख धनश्री विचारे, समाजसेविका सुनंदा बाविस्कर, समाजसेविका देवकी शिंदे तसेच महिला आघाडीच्या अनेक कार्यकर्त्या वं पदाधिकारी मोठ्या संख्येने उपस्थित होत्या, तर उपजिल्हाप्रमुख रोहिदास पाटील यांचे मार्गदर्शन आंदोलनाला लाभले.
या वेळी उपस्थित महिलांनी काँग्रेसविरोधात जोरदार घोषणाबाजी करत निषेध नोंदविला. काँग्रेस मुर्दाबाद अशा घोषणा देत महिलांना राजकीय आरक्षण नाकारणाऱ्या काँग्रेसचा जाहीर निषेध करण्यात आला. तसेच, काँग्रेस आणि त्यांच्या मित्रपक्षांच्या प्रतिमांना जोडे मारून संताप व्यक्त करण्यात आला.
आंदोलनादरम्यान महिला आरक्षण हा केवळ राजकीय मुद्दा नसून महिला सन्मान, महिला अधिकार आणि लोकशाही बळकटीकरणाचा प्रश्न असल्याचे मत व्यक्त करण्यात आले. महिलांना केवळ आश्वासने नव्हे, तर प्रत्यक्ष प्रतिनिधित्व मिळाले पाहिजे, अशी ठाम भूमिका या वेळी मांडण्यात आली.