रायगड पोलिसांना बॅरिकेड्स व ब्रेथ ॲनालायझर वाटप
धर्माधिकारी प्रतिष्ठानतर्फे वाहतूक नियमन व अपघात नियंत्रणासाठी महत्त्वाची मदत
अलिबाग, ता. १९ (वार्ताहर) : डॉ. नानासाहेब धर्माधिकारी प्रतिष्ठान, रेवदंडा यांच्या वतीने रायगड जिल्हा पोलीस विभागास ६१५ बॅरिकेड्स व १६ श्वासातील मद्य तपासणी यंत्र वाटप करण्यात आले. शुक्रवारी (ता.१७) रायगड पोलिस मुख्यालयात प्रतिष्ठानचे विश्वस्त डॉ. सचिन धर्माधिकारी, उमेश धर्माधिकारी व राहुल धर्माधिकारी यांनी जिल्हा पोलिस अधीक्षक आंचल दलाल यांच्याकडे ही सामग्री सुपूर्द केली.
यापूर्वीही पोलिस कल्याण निधीसाठी प्रतिष्ठानतर्फे पाच लाख रुपयांची मदत देण्यात आली होती. या योगदानाबद्दल पोलिस अधीक्षक आंचल दलाल यांनी प्रतिष्ठानचे आभार मानले.
जिल्ह्यातील वाहतूक नियमनासाठी हे बॅरिकेड्स उपयुक्त ठरणार असून, अपघात नियंत्रणासाठी श्वासातील मद्य तपासणी यंत्र महत्त्वाची भूमिका बजावणार आहेत. मद्यप्राशन करून वाहन चालविणाऱ्यांवर कारवाई करण्यासाठी ही मशिन्स जिल्ह्यातील विविध पोलिस ठाण्यांना वितरित करण्यात येणार आहेत.