तंबाखूजन्य साठ्यावर कारवाई
उल्हासनगर, ता. १९ (वार्ताहर) ः शहरात बंदी घातलेला गुटखा आणि तंबाखूजन्य पदार्थांच्या अवैध साठ्यावर अन्न व औषध प्रशासनाने कारवाई केली. यात सुमारे पाच लाख रुपयांचा माल जप्त करण्यात आला. शहाड फाटक परिसरातील गोदामावर टाकलेल्या छाप्यात एकाला अटक करण्यात आली असून, दोन जण फरार आहेत.
ठाणे अन्न व औषध प्रशासनाने शहाड फाटक परिसरात छापा टाकत प्रतिबंधित गुटखा, पानमसाला व तंबाखूजन्य पदार्थांचा सुमारे पाच लाख पाच हजार रुपयांचा साठा जप्त केला. अन्न सुरक्षा अधिकारी रणजित माने यांना मिळालेल्या माहितीच्या आधारे ही कारवाई करण्यात आली. संबंधित ठिकाणी अरबाज तशीर खान, लोकेश बजाज आणि मनीष यादव हे अवैधरीत्या गुटखा व पानमसाला विक्री करीत असल्याचे उघड झाले. पथकाने छापा टाकत मोठ्या प्रमाणात साठा जप्त केला. तसेच अरबाज खानला ताब्यात घेतले. इतर दोन आरोपी फरार झाले असून, त्यांचा शोध सुरू आहे.