अकरावी प्रवेश प्रक्रिया यंदाही ऑनलाइन
संकेतस्थळावर नोंदणी सुरू
जुईनगर, ता. १९ (बातमीदार) : शैक्षणिक वर्ष २०२६-२७ साठी राज्यातील इयत्ता अकरावीची प्रवेश प्रक्रिया यंदाही पूर्णपणे ऑनलाइन पद्धतीने राबविण्यात येणार असल्याची घोषणा शिक्षण संचालनालयाने केली आहे. त्यानुसार १० एप्रिल २०२६ रोजी सकाळी १० वाजल्यापासून प्रवेश अर्जाच्या भाग-१ भरण्याची प्रक्रिया सुरू झाली आहे.
विद्यार्थ्यांना अधिकृत संकेतस्थळावर नोंदणी करून अर्ज भरता येणार असून, दहावीचा निकाल जाहीर झाल्यानंतर भाग-२ भरण्याची सुविधा उपलब्ध होणार आहे. यंदाही केंद्रीय ऑनलाइन प्रणालीद्वारे कॅप (केंद्रीय प्रवेश प्रक्रिया) राबविण्यात येणार असून, विद्यार्थ्यांना दहावीतील गुणांच्या आधारे कनिष्ठ महाविद्यालयांमध्ये प्रवेश दिला जाईल.
अर्ज प्रक्रियेत नोंदणी, भाग-१ भरणे, अर्ज प्रमाणित करणे आणि निकालानंतर भाग-२ मध्ये महाविद्यालयांचा पसंतीक्रम नोंदवणे हे टप्पे असणार आहेत. विद्यार्थ्यांना किमान १ ते कमाल १० महाविद्यालयांची निवड करता येणार आहे.
शिक्षण संचालक डॉ. महेश पालकर यांनी विद्यार्थी व पालकांनी वेळेत अर्ज भरावा, असे आवाहन केले आहे.