सकाळ वृत्तसेवा
ठाणे, ता. २० : शास्त्रीनगर परिसरात सुरू असलेल्या ‘मिलन मटका’ जुगारावर वर्तकनगर पोलिसांनी छापा टाकत चौघांना ताब्यात घेतले. या कारवाईत जुगाराचे साहित्य व रोख रक्कम जप्त करण्यात आली आहे. शास्त्रीनगर नाका येथे संशयित व्यक्ती मिलन मटका नावाचा जुगार खेळत व खेळवत असल्याची माहिती मिळाल्यानंतर पोलिसांनी शनिवारी (ता. १८) रात्री सव्वानऊ वाजण्याच्या सुमारास सापळा रचला. याप्रकरणी विष्णु नायर (वय ३१), प्रवीण इंगळे (३२), सोनू यादव (३४) आणि अर्जुन मोर्या (२५) यांना ताब्यात घेण्यात आले. त्यांच्या ताब्यातून जुगाराचे साहित्य, तसेच एक हजार ५२० रुपयांची रोकड जप्त करण्यात आली. याप्रकरणी चौघांविरोधात गुन्हा दाखल करण्यात आला असून, पुढील तपास वर्तकनगर पोलिस करत आहेत.