सेवा सहयोग फाउंडेशनतर्फे पोलिसांना हेल्मेटवाटप
रस्ता सुरक्षेसाठी ‘राइट टू सेफ्टी’ अभियान
पेण, ता. २० (वार्ताहर) : सेवा सहयोग फाउंडेशन या संस्थेच्या माध्यमातून रविवारी (ता. १९) पेण पोलिसांना हेल्मेटचे वाटप करून रस्ता सुरक्षेसाठी ‘राइट टू सेफ्टी’ अभियान राबवण्यात आले. या वेळी पोलिस निरीक्षक संदीप बागूल यांनी पोलिस अधिकाऱ्यांसह सर्व कर्मचाऱ्यांनी हेल्मेटचा दररोज पुरेपूर वापर करावा, असे सांगितले.
ही संस्था देशभरात पर्यावरण, शिक्षण, महिला सक्षमीकरण तसेच मराठी शाळांतील विद्यार्थ्यांसाठी, त्यांच्या शाळांतील सुखसोयींसाठी काम करीत असून, फाउंडेशनच्या माध्यमातून आजवर असंख्य पोलिस कर्मचाऱ्यांना सुरक्षाकवच म्हणून हेल्मेटचे वाटप केले आहे. पेण येथील ४२ अधिकारी आणि कर्मचारी तसेच उर्वरित वाहतूक शाखेतील पोलिस कर्मचाऱ्यांनासुद्धा हेल्मेटचे वाटप करण्यात आले आहे, असे सेवा सहयोग फाउंडेशनचे व्यवस्थापक विनय बर्वे आणि सहव्यवस्थापक गणेश संसारे यांनी बोलताना सांगितले.