महालक्ष्मी यात्रेची दिमाखदार सांगता
१५ दिवसात कोट्यवधींच्या उलाढालीचा अंदाज
कासा, ता. २० (बातमीदार)ः डहाणू तालुक्यातील विवळवेढे येथील चैत्र पौर्णिमेपासून सुरू झालेल्या महालक्ष्मी जत्रेची सांगता उत्साहात झाली. हनुमान जयंतीपासून १५ दिवस चाललेल्या या जत्रेत यंदा कोट्यवधी रुपयांची उलाढाल झाल्याचा अंदाज वर्तवण्यात येत आहे.
२ एप्रिलपासून सुरू झालेली जत्रा १७ एप्रिल रोजी औपचारिकरीत्या संपली, तर २० एप्रिलपर्यंत तुरळक गर्दी कायम होती. जत्रेत फुलहार, प्रसाद, मिठाई, कंदी पेढा, पाळणे, भाजीपाला, थंड पेये, मटण-चिकन, सुके मासे, मसाले, खेळणी, भांडी व औजारे अशा विविध प्रकारची शेकडो दुकाने थाटली होती. महाराष्ट्रासह गुजरात राज्यातून आलेल्या व्यावसायिकांचा चांगला व्यवसाय झाला. शेवटच्या आठवड्यात मोठ्या प्रमाणात भाविकांनी हजेरी लावल्याने उलाढालीने उच्चांक गाठला.
---------------------------
स्थानिकांना रोजगार
विवळवेढे, चारोटी, कासा परिसरातील नागरिकांना जत्रेमुळे मोठ्या प्रमाणावर रोजगार उपलब्ध झाला. मुंबई-अहमदाबाद महामार्गावरील हॉटेल्स व इतर व्यवसायांनाही फायदा झाला. गर्दीच्या दिवशी १.५ ते २ कोटींची उलाढाल झाली, तर सामान्य दिवसांमध्ये ७० ते ८० लाखांची उलाढाल नोंदवली गेली.