पाणी टाक्यांवर जाहिरातबाजी

भिवंडी (वार्ताहार) : भिवंडी महानगरपालिकेच्या लाखो लिटर पाणी साठवणाऱ्या पाणी टाक्यांवर परस्पर रंगरंगोटी करून जाहिरातबाजी करण्यात आली आहे. याबाबत पालिका प्रशासन अनभिज्ञ असल्याचे समोर आले आहे. बऱ्याच वेळा पाण्याच्या टाक्यांवर पालिका प्रशासनाकडून पालिकेचे नाव तसेच ‘पाणी वापरा, पाणी वाचवा’ अशा जाहिराती करून जनजागृती केली जाते. पण भिवंडी शहरातील टेमघर, भादवड, फेणेपाडा येथील लाखो लिटर पाणी साठवणूक करणाऱ्या टाक्यांवर एका खाजगी कंपनीकडून रंगरंगोटी करून जाहिरातबाजी केल्याचा प्रकार समोर आला आहे. या बाबत पालिका जाहिरात व पाणीपुरवठा विभाग येथे चौकशी केली असता अशा पद्धतीने जाहिरात करण्याबाबत कोणीही पालिका प्रशासनाकडून परवानगी घेतली नसल्याची माहिती दिली आहे.