गव्हाण फाटा ते चिरनेर रोड सुरू; नागरिकांना दिलासा !
उलवे, ता, २२ (बातमीदार) : उरण मार्गावरील गव्हाण फाटा ते चिरनेर रोड या महत्त्वाच्या रस्ता वाहतुकीसाठी खुला करण्यात आला आहे. गेली अनेक वर्षे रखडलेल्या या कामामुळे नागरिकांना मोठ्या अडचणींचा सामना करावा लागत होता; मात्र आता रस्ता सुरू झाल्याने प्रवाशांमध्ये समाधानाचे वातावरण आहे. या रस्त्याचे काम सुरू झाल्यापासून परिसरातील वाहतुकीवर मोठा परिणाम झाला होता.
त्यामुळे प्रवासाचा वेळ वाढत होता. तसेच अनेकदा वाहतूक कोंडीही निर्माण होत होती. विशेषतः कामावर जाणाऱ्या नागरिकांना, विद्यार्थ्यांना आणि व्यापाऱ्यांना याचा मोठा त्रास सहन करावा लागत होता. अखेर प्रशासनाने या रस्त्याचे काम पूर्ण करून तो वाहतुकीसाठी खुला केला आहे. नव्याने तयार झालेल्या रस्त्यामुळे प्रवास अधिक सुलभ आणि जलद झाला आहे. त्यामुळे उरण मार्गावरील वाहतूक सुरळीत होण्यास मदत होणार आहे.