सानपाडा परिसरात मोबाईल चोरट्यांचा धुमाकूळ

नवी मुंबई, ता. २४ (वार्ताहर) : सानपाडा परिसरात मोबाईल चोरट्यांनी धुमाकूळ घातला आहे. दोन वेगवेगळ्या घटनांमध्ये चोरट्यांनी महागडे मोबाईल हिसकावून नेल्याचे समोर आले आहे. याप्रकरणी सानपाडा पोलिसांनी गुन्हे दाखल केले असून आरोपींचा शोध युद्धपातळीवर सुरू केला आहे.
पाम बीच रोडकडे जाणाऱ्या मार्गावर मंगळवारी (ता. २१) रात्रीच्या सुमारास अनुराग सेन त्यांच्या पत्नीसोबत शतपावली करीत होते. याच वेळी एका दुचाकीवरून आलेल्या चोरट्यांनी अनुराग यांच्या हातातील ५० हजारांचा मोबाईल खेचून पलायन केले. तर, सोमवारी (ता. २०) सानपाडा सेक्टर १७ मधील द अफेअर्स बिल्डिंगसमोर शिवम महाराणा हे मोबाईलवर बोलत असताना दुचाकीवरील चोरट्यांनी त्यांच्या हातातील मोबाईल खेचण्याचा प्रयत्न केला. या वेळी झालेल्या झटापटीत चोरट्यांनी शिवमला धक्का देऊन खाली पाडले व मोबाईल घेऊन पसार झाले. या दोन्ही घटनांनंतर सानपाडा पोलिसांनी चोरट्यांविरोधात जबरी लुटीचा गुन्हा दाखल केला असून सीसीटीव्ही फुटेजच्या आधारे तपास सुरू केला आहे.