विक्रमगड (बातमीदार) : तालुक्यातील पाणीटंचाईसंदर्भात श्रमजीवी संघटनेच्या विक्रमगड शाखेच्या शिष्टमंडळाने पंचायत समितीमध्ये आयोजित बैठकीमध्ये विविध विषयावर प्रशासनाबरोबर चर्चा केली. तालुक्यात ज्या गाव-पाड्यांत टंचाई आहे किंवा आगामी दिवसांत निर्माण होणार आहे, तेथे योग्य त्या उपाययोजना करून लोकांना पाणी उपलब्ध करून द्यावे, अन्यथा येत्या आठ दिवसांमध्ये नागरिकांना पिण्यासाठी पाणी उपलब्ध करून न दिल्यास श्रमजीवी संघटनेकडून आंदोलन करण्यात येईल, असा इशारा देण्यात आला. या शिष्टमंडळामध्ये जिल्हा उपाध्यक्ष वसंत पवार, तालुका अध्यक्ष मंगेश काळे, तालुका सचिव प्रकाश पिंगळे, तालुका उपाध्यक्ष गीता लोहार, तसेच प्रमुख कार्येकर्ते उपस्थित होते.