देखभालीच्या खर्चावरून प्रशासन धारेवर
‘स्थायी’तील प्रस्ताव राखीव

सकाळ वृत्तसेवा
मुंबई, ता. २२ : मुंबईतील जलवाहिन्यांच्या शेजारी सायकल ट्रॅक, उद्यान साकारण्याचा निर्णय पालिका प्रशासनाने घेतला आहे. मात्र, जलवाहिन्यांशेजारी अतिक्रमण झाले असून ना उद्यान ना सायकल ट्रॅक तरी देखभालीचा खर्च सात कोटी, अशा शब्दांत स्थायी समितीत सदस्यांनी प्रशासनाला धारेवर धरले.
जलवाहिन्यांशेजारी सायकल ट्रॅक, उद्यान साकारण्याचा निर्णय पालिका प्रशासनाने घेतला आहे; मात्र जलवाहिन्यांशेजारी अतिक्रमण झाले आहे. तरीही प्रशासनाने देखभालीसाठीचा प्रस्ताव आणला आहे. प्रशासन दिशाभूल करत आहे, असा आरोप स्थायी समिती सदस्या दीपमाला बढे यांनी केला. सायकल ट्रॅकच्या नावाखाली लोकांना विस्थापित केले, सायकल ट्रॅक का नाही याचा अहवाल मागवा, अशी मागणी राखी जाधव यांनी या वेळी केली. वाकोला पाईप लाइन येथे लोकांच्या घरावर कारवाई केली आणि आता १८ किलोमीटरसाठी सात कोटींचा प्रस्ताव आणता, असा हल्लाबोल ट्युलिप मिरांडा यांनी केला. सायकल ट्रॅक नाही, उद्यान नाही मग देखभालीचा प्रस्ताव का आणला, असा सवाल सदस्यांनी उपस्थित केल्याने स्थायी समिती अध्यक्ष प्रभाकर शिंदे यांनी प्रस्ताव राखून ठेवला.