ठाणे : मुंब्रा येथील सहयोग अपार्टमेंट परिसरातील ठाणे महापालिका जुन्या मुंब्रा प्रभाग समिती कार्यालयामध्ये बुधवारी (ता. २२) सायंकाळी आग लागल्याची घटना घडली. जवळपास दोन तासांनी आगीवर नियंत्रण मिळविण्यात यश आले. या घटनेत कोणालाही दुखापत झाली नसली तरी मोठे नुकसान झाले आहे. या आगीच्या घटनेसंदर्भात माहिती मिळताच मुंब्रा अग्निशमन केंद्राचे जवान तत्काळ दोन फायर इंजिन, दोन हायराईझ फायर वाहन व एक रेस्क्यू वाहनासह घटनास्थळी दाखल झाले. त्या जवानांनी तत्परतेने कारवाई करत आगीवर नियंत्रण मिळविण्यासाठी प्रयत्न सुरू केल्यावर रात्री ९ वाजताच्या सुमारास आग पूर्णपणे नियंत्रणात आणल्यानंतर कुलिंग करण्यासाठी उशीर झाला. आगीचे नेमके कारण अद्याप समजू शकलेले नाही, अशी माहिती ठाणे महापालिकेच्या आपत्ती व्यवस्थापन कक्षाने दिली.