विद्यार्थ्यांकडून रेवदंडा किल्ल्यावर स्वच्छता मोहीम
जिंदल विद्यामंदिरच्या विद्यार्थ्यांचे श्रमदान
मुरूड, ता. २३ (बातमीदार) : ऐतिहासिक वारसा जतन करण्याच्या उद्देशाने साळाव येथील जिंदल विद्यामंदिरच्या विद्यार्थ्यांनी रेवदंडा किल्ल्यावर स्वच्छता अभियान राबवून एक आदर्श घालून दिला. इयत्ता नववी ‘अ’ मधील ३१ विद्यार्थ्यांनी शिक्षकांच्या मार्गदर्शनाखाली किल्ल्याच्या परिसराची स्वच्छता करत श्रमदानाचा अनोखा अनुभव घेतला.
या उपक्रमात शिक्षिका अफी बाशा आणि सुशील अभंगे यांनी विद्यार्थ्यांना मार्गदर्शन केले. विद्यार्थ्यांनी किल्ल्याभोवती साचलेला प्लॅस्टिक कचरा, सुकी पाने व झुडपे साफ करून परिसर स्वच्छ केला. “स्वच्छता हीच सेवा” हा संदेश त्यांनी कृतीतून प्रभावीपणे दिला.
या वेळी जेईटी प्रमुख डॉ. भावेश भालेराव यांनी विद्यार्थ्यांचे कौतुक करत, ऐतिहासिक ठेव्यांचे जतन करणे ही प्रत्येक नागरिकाची जबाबदारी असल्याचे सांगितले. विद्यार्थ्यांचा हा उपक्रम समाजासाठी प्रेरणादायी असल्याचे त्यांनी नमूद केले.
शाळेचे प्राचार्य मुकेश ठाकूर, उपप्राचार्य मंगेश बमनोटे तसेच व्यवस्थापन समितीचे अध्यक्ष पंकज मलिक यांनीही विद्यार्थ्यांच्या कार्याचे कौतुक केले. या उपक्रमामुळे विद्यार्थ्यांमध्ये सामाजिक जाणीव आणि ऐतिहासिक ठेव्यांविषयी आदर निर्माण झाला आहे.