अंबरनाथ (वार्ताहर) : किरकोळ शाब्दिक वादाचे रूपांतर हाणामारीत होत अंबरनाथ पश्चिम परिसरात एका तरुणावर काचेच्या बाटलीने हल्ला केल्याची घटना घडली आहे. याप्रकरणी अंबरनाथ पोलिस ठाण्यात गुन्हा दाखल करण्यात आला आहे.
खामकरवाडी, वाळेकर होम्सच्या मागील परिसरात गुरुवारी (ता. २३) रात्री ९.४५ वाजता भास्कर भंगारे (वय २३) मित्रांसोबत उभे असताना सुशांत मुंढे (वय १९) याने ‘दम असेल तर समोरून मार’ असे आव्हान दिले. त्यावर फिर्यादीने ‘तू अजून लहान आहेस’ असे उत्तर दिल्याने आरोपी संतापला. यानंतर आरोपीने भंगारे यांची कॉलर पकडून त्यांना चापट मारली. ते खाली पडल्यावर फुटलेल्या काचेच्या बाटलीने डोके, पाठ आणि उजव्या हाताच्या कोपऱ्यावर वार करून जखमी केले. या घटनेनंतर भंगारे यांनी अंबरनाथ पोलिस ठाण्यात तक्रार दाखल केली. त्यानुसार पोलिसांनी मुंढेविरुद्ध गुन्हा नोंदवला आहे.