नवी मुंबई, ता. २६ (वार्ताहर) : तुर्भे पोलिसांच्या गुन्हे प्रकटीकरण पथकाने एका सराईत रिक्षाचोराला अटक केली आहे. नीलेश सुभाष पाटील (वय ४२) याच्या अटकेमुळे तुर्भे आणि खारघर परिसरातील रिक्षाचोरीचे तीन गुन्हे उघडकीस आले असून तीन वाहने जप्त केली आहेत.

३ एप्रिलला तुर्भे पोलिस ठाण्यात रिक्षाचोरीचा गुन्हा दाखल झाला होता. त्यानुसार तुर्भे पोलिस ठाण्याचे वरिष्ठ निरीक्षक आबासाहेब पाटील यांच्या मार्गदर्शनाखाली सहाय्यक निरीक्षक समीर चासकर, हवालदार मिलिंद कांबळे, नाईक किरण घुगे, अमित तडवी आणि पोलिस शिपाई सुनील सकट आदींच्या पथकाने घटनास्थळावरील सीसीटीव्ही फुटेजची कसून तपासणी केली. त्यानंतर गुप्त बातमीदार आणि तांत्रिक तपासाच्या आधारे पोलिसांनी संशयित आरोपी नीलेश याला महापे येथून ताब्यात घेतले. त्यानंतर पोलिसांनी त्याची कसून चौकशी केली असता, त्याने तुर्भेच नव्हे तर खारघर परिसरातूनही रिक्षा चोरल्याची कबुली दिली. त्यानुसार पोलिसांनी त्याच्याकडून एकूण दोन लाखांच्या तीन रिक्षा जप्त केल्या आहेत. यापूर्वी त्याच्यावर कोपरखैरणे पोलिस ठाण्यातही चोरीचा गुन्हा दाखल आहे.